อลภตีติ ปรปวาโท อาคจฺเฉยฺยาติ เอวํ อตฺตานํ รกฺขาหิ กถํ มมํ รกฺขสิ
มิลินฺโท ราชา ปสนฺโน ปสนฺนาการํ น กโรตีติ เอวํ มมํ รกฺขาหีติ ฯ ตถา โหตุ
มหาราชาติ ฯ เสยฺยาถาปิ ภนฺเต สีโห มิคราชา สุวณฺณปญฺชเร ปกฺขิตฺโต พหิมุโขเยว
โหติ เอวเมว โข อหํ ภนฺเต กิญฺจาปิ อคารํ อชฺฌาวสามิ พหิมุโขเยว อจฺฉามิ สเจ
อหํ ภนฺเต อคารสฺมา อนคาริยํ ปพฺพาเชยฺยํ น จิรํ ชีเวยฺยํ พหู เม ปจฺจตฺถิกาติ ฯ
อถ โข อายสฺมา นาคเสโน มิลินฺทสฺส รญฺโญ ปญฺหํ วิสชฺเชตฺวา อุฏฺฐายาสนา สงฺฆารามํ
อคมาสิ ฯ อจิรปกฺกนฺเต อายสฺมนฺเต นาคเสน มิลินฺทสฺส รญฺโญ เอตทโหสิ กึ มยา
ปุจฺฉิตํ กึ ภทนฺเตน วิสชฺชิตนฺติ ฯ อถ โข มิลินฺทสฺส รญฺโญ เอตทโหสิ สพฺพํ มยา
สุปุจฺฉิตํ สพฺพํ ภทนฺเตน สุวิสชฺชิตนฺติ ฯ อายสฺมโตปิ นาคเสนสฺส สงฺฆรามคตสฺส เอตทโหสิ
กึ มิลินฺเทน รญฺญา ปุจฺฉิตํ กึ มยา วิสชฺชิตนฺติ ฯ อถร โข อายสฺมโต นาคเสนสฺส
สฺฆาราคตสฺส เอตทโหสิ สพฺพํ มิลินฺเทน รญฺญา สุปุจฺฉิตํ สพฺพํ มยา
สุวิสชฺชิตนฺติ ฯ อถ โข อายสฺมา นาคเสโน ตสฺสา รตฺติยา อจฺจเยน ปุพฺพณฺหสมยํ
นิวาเสตฺวา ปตฺตจีวรมาทาย เยน มิลินฺทสฺส รญฺโญ นิเวสนํ เตนุปสงฺกมิ อุปสงฺกมิตฺวา
ปญฺญตฺตาสเน นิสีทิ ฯ อถ โข มิลินฺโท ราชา เยนายสฺมา นาคเสโน เตนุปสงฺกมิ
อุปสงฺกมิตฺวา อายสิมนฺตํ นาคเสนํ อภิวาเทตฺวา เอกมนฺตํ นิสีทิ ฯ เอกมนฺตํ นิสินฺโน
โข มิลินฺโท ราชา อายสฺมนฺตํ นาคเสนํ เอตทโวจ ภนฺเต นาคเสน มา โข ภทนฺตสฺส
เอวํ อโหสิ นาคเสนสฺส มยา ปญฺโห ปุจฺฉิโต เตเนว โสมนสฺเสน ตํ รตฺตวเสสํ วีตินาเมติ
เอวํ น ทฏฺฐพฺพํ ตสฺส มยฺหํ ภนฺเต ตํ รตฺตาวเสสํ เอตทโหสิ กึ มยา ปุจฺฉิตํ กึ
ภทนฺเตน สุวิสชฺชิตนฺติ สพฺพํ มยา ปญฺหํ ปุจฺฉิตํ สพฺพํ ภทนฺเตน สุวิสชฺชิตนฺติ ฯ
เถโร อาห มา โข มหาราช ตุมฺหํ เอตํ อโหสิ มิลินฺทสฺส รญฺโญ ปญฺโห มยา
วิสชฺชิโตติ เตเนว โสมสนฺเสน ตํ รตฺตาวเสนํ สุปติ น เอวํ ทฏฺฐพฺพํ ตสฺส มยา วิสชฺชิตนฺติ
สพฺพํ มิลินฺเทน รญฺญา ปุจฺฉิตํ สพฺพํ มยา สุวิสชฺชิตนฺติ ฯ อิติห เต อุโภ ปณฺฑิตา
อญฺญมญฺญสฺส สุภาสิตํ สุลปตํ สมนุโมทึสูติ

ทุกฺกรปญฺโห เอกูนวีสติโม ฯ

สตฺตโม วคฺโค ฯ

วิเสสปญฺโห

ราชา อาห ภนฺเต นาคเสน ภาสิตํ เจตํ ภควตา มาตุจฺฉาย มหาปชาปติยา
โคตมิยา นวทุสฺสยุคํ ทิยมานาย สํเฆ โคตมิ เทหิ สํเฆ เต ทินฺเน อหญฺเจว ปูชิโต
ภวิสฺสามิ สํโฆ จาติ กินฺนุ โข ภนฺเต นาคเสน ตถาคโต สํฆรตนโต น ภาริโก น
ครุโก ทกฺขิเณยฺโย ฯ ยํ หิ วตฺถยุคลํ ตาย มาตุจฺฉาย สยํ วิปิงฺคิตํ สยํ ลุญฺจิตํ
สยํ วตฺตกํ สยํ โปฏฺฐํ สยํ กนฺติตํ สยํ วายิตํ วตฺถยุคลํ ทิยมานํ อตฺตโน ทิยามานํ
ตถาคโต ภิกฺขุสํฆสฺส ทาเปสิ ยทิ ภนฺเต นาคเสน ตถาคโต สํฆรตนโต อุตฺตริโก อธิโก
วา วิสิฏฺโฐ วา ภาเวยฺย มยิ ทินฺเน มหปฺผลํ ภวิสฺสตีติ น ตถาคโต มาตุจฺฉาย
มหาปชาปติยา ตํ สํฆสฺส เทหีติ สํเฆ ทาเปยฺย ยสฺมา จ โข ภนฺเต นาคเสน ตถาคโต
อตฺตานํ น ปตฺตียติ น อุปนียติ ตสฺมา ตถาคโต มาตุจฺฉาย ตํ สํฆสฺส ทาเปสีติ ฯ
เถโร อาห ภาสิตญฺเจตํ มหาราช ภควตา มาตุจฺฉาย มหาปชาปติยา โคตมิยา สาฏกา
ทิยมานานาย สํเฆ โคตมิ เทหิ สํเฆ เต ทินฺเน อหญฺเจว ปูชิโต ภวิสฺสามิ สํโฆ
จาติ ตญจ ปน วตฺถยุคํ อตฺตโน อนูปนียมานํ น อจิตฺติกตาย นน อทกฺขิเณยฺยตาย
อปิจ มหาราช หิตตฺถาย อนุกมฺปาย อนาคตมทฺธานํ สํโฆ มม อจฺจเยน จิตฺติกโต
ภวิสฺสตีติ วิชฺชมาเนเยว คุเณ ปติฏฺฐํ ชนยนฺโตเยว เอวมาห สํเฆ โคตมิ เทหิ สํเฆ
เต ทินฺเต อหญฺเจว ปูชิโต วิสฺสามิ สํโฆ จาติ ฯ ยถา มหาราช ปิตา ธรมาโนเยว
อมจฺจคณโทวาริกอนีกฏฺฐปาริสชฺชานํ มชฺเฌ รญฺโญ สนฺติเก ปุตฺตสฺส สํวิชฺชมาเน คุเณ
ปฏิกิตฺเตติ อิธ ฐปิโต อนาคตมทฺธาเน ชนมชฺเฌ ปูชิโต ภวิสฺสตีติ เอวเมว โข มหาราช
ตถาคโต หิตตฺถาย อนุกมฺปาย อนาคตมทฺธานํ สํโฆ มม อจฺจเยน จิตฺติกโต ภวิสฺสตีติ
วิชฺชามานเกเยว คุเณ ปติฏฐํ ชนยนฺโต เอวมาห สํเฆ โคตมิ เทหิ สํเฆ เต ทินฺเน
อหญฺเจว ปูชิโต ภวิสฺสามิ สํโฆ จาติ ฯ น โข มหาราช ตาวตฺตเกน จ
สาฏกานุปฺปทานมตฺเตน สํโฆ ตถาคตา อธิโก วา โหติ วิสิฏโฐ วาติ ฯ ยถา มหาราช
มาตาปิตโร นาม ปุตฺตานํ อจฺฉาเทนฺติ ปริมณฺเฑนฺติ นฺหาเปนฺติ สมฺพาหนํ เทนฺติ อปิ
นุ โข มหาราช ตาวตฺตเกน อจฺฉาทนปริมณฺฑนนฺหาปนเสมฺพาหนมตฺตเกน ปุตฺโต มาตาปิตูหิ
อธิโก นาม โหติ วิสิฏฺโฐ วาติ ฯ น หิ ภนฺเต อกามกรณียํ ภนฺเต ปุตฺโต